جمعرات کو پیگاسس جاسوسی کیس کی سماعت کرتے ہوئے، سپریم کورٹ نے کہا کہ اب وہ اگلے ہفتے اس معاملے پر حکم جاری کرے گی۔
اسی دوران سماعت کے دوران چیف جسٹس این وی رمنا نے کہا کہ سپریم کورٹ تکنیکی ماہرین کی ایک کمیٹی تشکیل دینا چاہتی ہے۔ بعض ماہرین نے ذاتی وجوہات کی بنا پر کمیٹی میں شرکت سے معذوری ظاہر کی ہے۔ جس کی وجہ سے احکامات کے اجراء میں تاخیر ہورہی ہے۔
سپریم کورٹ نے 13 ستمبر کو اپنا حکم محفوظ رکھتے ہوئے کہا تھا کہ وہ صرف یہ جاننا چاہتی ہے کہ آیا مرکز نے مبینہ طور پر شہریوں کی جاسوسی کے لیے پیگاسس اسپائی ویئر کا غیر قانونی استعمال کیا ہے۔
مرکز نے قومی سلامتی کا حوالہ دیتے ہوئے جاسوسی کیس کی آزادانہ تحقیقات کی درخواستوں پر حلف نامہ داخل کرنے سے صاف انکار کردیا تھا۔
آزادانہ تحقیقات کا مطالبہ کرنے والی درخواستوں کا تعلق اسرائیلی فرم Niv, Shalev and Omri (NSO) کے اسپائی ویئر پیگاسس کا استعمال کرتے ہوئے نامور شہریوں، سیاست دانوں اور مصنفین کی سرکاری ایجنسیوں کی مبینہ جاسوسی کی رپورٹوں سے ہے۔
ایک بین الاقوامی میڈیا کنسورشیم نے اطلاع دی ہے کہ 300 سے زیادہ تصدیق شدہ ہندوستانی موبائل فون نمبر پیگاسس اسپائی ویئر کا استعمال کرتے ہوئے نگرانی کے ممکنہ اہداف کی فہرست میں تھے۔
***
