سنیکت کسان مورچہ کے زیر اہتمام اتوار 5 ستمبر کو جی آئی سی گراؤنڈ مظفر نگر میں کسان مہاپنچایت کا انعقاد کیا جا رہا ہے۔
تین مرکزی فارم قوانین کے خلاف مظفر نگر میں ہونے والی مہاپنچایت کے لیے ملک بھر سے کسان آنا شروع ہو گئے ہیں۔ ضلع کی سرحد کو ہائی الرٹ پر رکھا گیا ہے۔ کسانوں نے صبح سے ہی مہاپنچایت کے لیے پہنچنا شروع کر دیا ہے۔
بھارتیہ کسان یونین کے صدر چودھری نریش ٹکیت چودھری راکیش ٹکیت سمیت کئی کھاپوں کی پنچایت سائٹ پر پہنچ گئے ہیں۔ اندازہ لگایا جا رہا ہے کہ شام تک مہا پنچایت میں بڑی تعداد میں کسان شرکت کریں گے۔
بھارتیہ کسان یونین کے قومی ترجمان چودھری راکیش ٹکیت نے اعلان کیا ہے کہ مہاپنچایت میں بڑا فیصلہ لیا جائے گا۔ انہوں نے کہا کہ بہتر ہو گا کہ مرکزی حکومت کو بھارتیہ جنتا پارٹی کی حکومت نہ کہا جائے اور اسے مودی حکومت کہا جائے۔ اس حکومت نے زراعت کے تین قوانین پاس کئے۔ یہ کسانوں کے حق میں نہیں ہے۔ یہ قانون ملک کو غیر ملکی ہاتھوں میں دینے کی مکمل تیاری ہے۔
ٹکیت نے کہا کہ کسان تین زرعی قوانین کے خلاف احتجاج میں 9 ماہ سے دہلی کے آس پاس بیٹھے ہیں، لیکن حکومت کسانوں کی بات نہیں سن رہی ہے۔
دوسری جانب انتظامیہ نے سیکیورٹی کے سخت انتظامات کیے ہیں۔ لوگوں کی نقل و حرکت کو دیکھتے ہوئے سیکورٹی کے پیش نظر پولیس فورس تعینات کی گئی ہے۔ ہر جگہ پولیس تعینات ہے۔ نگرانی کے لیے سی سی ٹی وی کیمرے بھی لگائے گئے ہیں۔
***
